I ha dir zuegluegt geschter am Aabe wie du bisch cho
Vom Marzili här, gäng wie gäng, vielecht chli höcher,
Oder schnäuer u breiter, mit emene dräckige Lache.
Bisch wyter, wie we nüt passiert wär, der Matte zue.

Niemer gsuuch dir a, was du hesch agschtellt denn
Früeh am Morge mit dim Wasser, mit Holz und Steine.
Ä neue Wäg hesch gsuecht u gfunge, dür d`Matte
Gfürchig, mannshöch bisch derhärcho, lut u wüescht.

Scho einisch vor Jahre hesch du üs zeigt was du chasch,
Denn bisch still und unuffällig dür d`Chällere ueche cho.
Hesch d`Strass überschwemmt u di breit gmacht
I de Loube, de Wohnige, üsne Läde und üsne Beize.

Das Jahr isch aues ganz angers gsy, uflätig u grob
Hesch du üs überrumplet, quer dür d`Matte u üses Läbe.
Niemer hets gwüsst, wo mes het gmerkt, scho z`spät.
Der Rägeboge isch d`Hoffnig vor der Sintfluet im Läbe …

pesche hueti. Sept. 05
nach dem Hochwasser vom 22. August 05